عتق رقبـــة

[عبدالله الطلحي الهذلي]

هذه القصيدة لها مناسبة كبيرة وللأسف الشديد لم تقال فيها
لأنني أُبلِغت أن الحفل تم إلغاؤه بعد أن أعددت له القصيدة
ولعلها تصل من خلال هذا الموقع إلى الرجل الشهم
ضيف الله بن غابش وأخوانه وربعه الكرام



يالله يامنشي مراويح الأمزان=تسبح بعالي الجو والما تشيله
رحمه توزعها على كل الأوطان=مافيه حي إلا ورزقه يجي له
تسقي بها دارٍ سناوي وضميان=وتبرد بها نار الكبود العليله
ياللي ليامن قال للشي كن كان=عليك مابه حاجةٍ مستحيله
ياواحدٍ نرجيك في كل الأحيان=يافارجٍ كرب الهموم الثقيله
ياجازي الإحسان عندك بالإحسان=في يوم كلٍ خايفٍ من حصيله
ولاعاد فيها غير عدلٍ وميزان=وهنيّكم ياكاسبين الفضيله
أمثال ضيف الله بن غابش والأخوان=اللي كسونا كلنا بالجميله
في ساعةٍ زاغت بها كل الأذهان=وضاقت بنا الحيلات مافيه حيله
دينٍ حضر وعده وقابل لديان=ياخذ سداده بالسيوف الصقيله
من بعد جهزنا حنوطه والأكفان=ودمع الخليل اللي موادع خليله
نظرة موادع من قرايب وصدقان=يانظرةٍ مابعدها من عقيله
وناديت للسياف من قلب ولسان=ناديت ياراعي الفعول الأصيله
واعتقت كل الناس بإعتاقك إنسان=وأحييت كل الناس باحسن وسيله
عندي على قولي دليلٍ وبرهان=في محكم التنزيل تلقى دليله
والعفو عند المقدره رغم الأحزان=من شيمة أصحاب النفوس النبيله
وانتم عفيتم ياطويلين الأيمان=كرامةٍ منكم ومده جزيله
تبقى لكم رايه على طول الأزمان=بيضاء ونذكرها سنينٍ طويله
أنتم هل النخوه شباباً وشيبان=وانتم بني سفيان نعم القبيله
وانتم حدادتنا عواني وجيران=وافعالكم بالطيب ماهي قليله
واليوم صرتوا خير قدوه وعنوان=والقافله تمشي بدرب الدليله
وصلوا على خير البشر نسل عدنان=مالاح براق الحيا في المخيله