غلطان من قال خيره كل تأخيره

[عبدالله الطلحي الهذلي]

غلطان من قال خيره كل تأخيـره=مايستوي في السَبَق ريّض وعجلاني

الحق ماكـل تأخيـره بهـا خيـره=كم فرصةٍ ضايعه من عمر الإنساني

طرايد الصيد ماتهدأ علـى سيـره=تبغالهـا رامـيٍ ماهـو بمتـوانـي

رامي سريعٍ بتصويبـه وتذخيـره=إن فاتها السهم الأول صابها الثانـي

الوقت ماينتظر من عاش في حيـره=والدرب ماينمشي من غير برهانـي

كل المصابيح تطفي في مشاويـره=مايجلي الظلمـه إلا نـور الإيمانـي

احسب مكاسب زمانك من مخاسيره=قدام تطلع من المشـوار خسرانـي

ماكل ميـراد مرتويـه مصاديـره=كم واردٍ غـادر الميـراد ظميانـي

بايامنا من وصوف الخيل تصويـره=تقبل وتقفي وعمر العبـد ميدانـي

تقبل مغيره عليه وتقفـي مغيـره=حتى يغادر من الميـدان وحدانـي

يانايم الليل حلمك ويش تفسيـره=القلب في غفلته والطرف نعسانـي

مايقطع الدرب من ديره ليا ديـره=إلا غلامٍ سرى والصبـح مابانـي

إن شفت نبت الربيع تفوح أزاهيره=إحذر تباطا تقول أمداه وامدانـي

إليا تباطيت فـي غفلـه وتفكيـره=ماتنتبه لين وإليا كـل شـي فانـي

إغنم ربيعك ليا عجّـت نواويـره=واقطف ثمارك مادام العـود ريانـي

فرصتك ماغيرها والعمـر ماغيـره=قبلك ربيعي تباطيـت.. وتعدانـي