أنا والشاعر الرائع ( عبدالله بن زربان المالكي )

[عبدالله الطلحي الهذلي]

قصيدة الشاعر الرائع/عبدالله بن زربان المالكي

غاص في غبة بحر وادرك زمان=وانثنى دون المعاني من سنين
قلب الدنيا على خوفٍ وامـــــــان=خذ وبقى لا يدان ولا يديـــــــن
ما طلع منها بعـــــــود الخيزران=والجمال معقله جوف الجريــن
منتسب لهذيــــــل في عالي مكان=ضيفهم يقلط على سمن وسمين
كـان يكتب في غزل صاف الثمان=لين صار الشيب في راسه مكين
خل ابو ناصر يـــــــــدور له دهان=في عظامه بعد شاب الراس لين
بعد شيب يحســــــــب انه دنجوان=والعذارى في غرامه ميتيــــن
بلغه بعد الســـــــــلام انه مدان=ما يبري ساحتـــــــه كثر الونين
السنين تمر ما فيها ضمـــــان=لا كتاب ولا جواب ولا حنيــــــن
زاد ماله والبطن كنـــــه ملان=قد درينا به مخاوي طيبـــــــــين
قله اسمــــع ثم رد بلا امتحان=لا تسمـــعني نصايــــــح عارفين
ندري انه رمح في راسه سنـــــــان=كل علمٍ عند ابو ناصر يقيـــــــن
مايجيب من العلوم الا السمـــــــان=والثمن ماهوب غالي للثميـــــــن
ودي اشكي ما لقيته من هـــــــوان=من جفا الايام والحــــزن الحزين
كيف اسوي لا هوى سرج الحصان=والليالي ســــــــــــود ما شياً يبين
لو بيمدي كـــــــــــان جودت العنان=في يدي والله لكم يا غـــــــــافلين
ما حسبت حساب من كسب الرهان=دامني كلــــــــي وما عندي رهين
من عطيته كل سري كيف خــــــان=مايسمــــــــى من يخونك بالامين
ما تجيب الهيل والا الزعفــــــــران=حنظلة فــــــي خبت والا ياسمين
مادرج بالقلب يحكيه اللســــــــان=كل حبٍ لا هيا يصبح طـــــــــحين
ذابت الشمعه وطاح الشمعــــــدان=وانكسر عود الحياه اللي مــتين
والجمل ماله شداد ولا بطـــــــــان=والرشا مطوي وللما مانــــــعين
عند بابك يالعظيم المستــــــــــعان=قد وقفنا يا امان الخايفيــــــــــن


وهذا ردي عليه


يابن زربان الحقوق اللــــي تصان=أنت خابرها وحنا خابـــــــــــرين
ليش ياراعي المعانـــــــي والبيان=الشمــــــــــــال تمدها قبل اليمين
كيف تعلنها حــــــــــــرابه يا فلان=ثم تلحقها ســــــــــلام المسلمين
كان وانك للمـــــــــــعاني ترجمان=لا تعداك المعاني يـــــــــــا فطين
فرق بين الحنظله والبرتكـــــــــان=فرق واضح وانت سيد الفاهمين
من زمان اول ليـــــــــا هذا الاوان=نحمي الماقف ونوفي كـــــل دين
القصيد نطوعــــــــــه طوع البنان=من عيون الشعر نملا كـــل عين
أنظم ابياتي عقود من الـــــــجمان=في نحور الغيــــد زينٍ فوق زين
الغزل نهديه لــــــــــعيون الحسان=عن متاهات الحـــــــرام مجنبين
والحكم كنز العقول اللـــــــي ذهان=لا تفوتك كان لك عـــــــقلٍ ذهين
صح انا غصت البحور ولا تهـــان=لين منها جيت بالـــــــدر الدفين
صح انا في التجربه شاهـــد عيان=واعرف المقفين واللـــي مقبلين
واعرف اللي صحبته كنـــــا وكان=يوم كنا في دروب التايــــــــهين
يوم حددت الهدف والـــــدرب بان=مالقيت اصحابنا متواجــــــــدين
جعل ذاك العود في خضـــر الجنان=صحبته كانت على تقــوى ودين
يوم وافاه الاجل والمـــــــوت حان=ماغدا التالين مثــــــــــل الاولين
كلهم ساروا علـــــــــى غير إتزان=واهني اللي رضــــــــي الوالدين
الليالي فـــــــــــــرقت بين الخوان=وابعدوا لو انهم متقـــــــــــابلين
عادة الدنيا تورينا الحنـــــــــــــان=ثم ترمينــــــــــــــا وحنا شايفين
أشغلتنا وهــــــــم في مضغ اللبان=واكتشفنا بعــــــــــده انا جايعين
مالنا الا الصبر والصابر معــــــان=والرجا في اللي يعين الصابرين
إشتكي للي عليم بكل شـــــــــــان=وإعرف إن الله حسيب الظالمين
وإعرف إن العنف غيــر العنفوان=ماتفيد الرجل مــــــــــدات اليدين
فات وقت البندقه والجمبخــــــــان=والحصان الحر والسيف السنين
سايس اوضاعك وخلك بهــــلوان=السياسه تجعل القاســـــــي يلين
والصلاه من الحقوق اللي تصـان=الصلاه على النبي ياسامــــــعين