أرفع البنـــدق

[عبدالله الطلحي الهذلي]

قال ابوناصر حياة المشاكل والهموم=مايعوّض في تعبها يكون دروسها
عرفتني بالدير والعوايد والسلوم=دار مامريت منها نشدت عسوسها
وانظم ابياتي وانا لي على شعري وسوم=طارحٍ وسمي على السابقه واسوسها
عادتي مااهوجس إلا وانا عندي علوم=واعرف اللي ماتجيب العلوم هجوسها
عالمٍ تعرض رخيص البضايع كل يوم=ماوجدنا كلمة الصدق في قاموسها
توصل الرجال بالمدح إلى حد النجوم=وفي غيابه ودها تطحنه بضروسها
والغشش يمشي على الناس لكن مايدوم=تمرةٍ من ذاق منها تبيّن سوسها
مير انا يالايمي لوم وإلا لاتلوم=عفت تربتها الرديه وعفت غروسها
مبتعد عنها وعايش مكرّم ومحَشوم=أعشق الطالات والطايحات ادوسها
اخذ الجزله واجنب عن الهزله واشوم=تقعد الهزله لناسٍ ضعاف نفوسها
وارفع البندق لياجت محاربة الخصوم=ماارمي إلا في نحور الرجال وروسها
لااحذف المقفي ولااتعب على غير اللزوم=واللوازم كل حاله لها ملبوسها
وامدح افعال النشامى لجل تبقى رسوم=ماني اللي يمدح الناس لجل فلوسها
النشامى تحرز المدح مع حب الخشوم=والردي لويشتريها تراه يحوسها