أحلامي الطفــولية

[عبدالله الطلحي الهذلي]

آه كم ونةٍ بالصدر مخفيّه=في حنايا من الأحزان مليانه
عقب كانت حديث قلوب سرّيه=ولعت جوف صدرٍ ثار بركانه
يوم عديت بالأقدام عصريه=فوق رجمٍ له الأقدام طربانه
رحت اغني واجاوب كل قمريه=وفز قلبي كما طيرٍ بجنحانه
وهل دمعي كما همّال وسميه=لين راحت ثيابي منه غرقانه
يوم لديت في الدار الخلاويه=وشفت منزالنا فيها ومرحانه
عشت لحظه مع احلامي الطفوليه=يوم كانت غصون العمر ريانه
شفت نفسي بذيك الديره الحيه=طفل غرقان في لعبه مع اخوانه
نصنع من الخيال جمال وهميه=مثل زمل البدو لاشدت اضعانه
ثم نشعب جمال الوهم طرقيه=يوم تقفي نغني ليل يادانه
كن ابويه يحقق بالنظر فيّه=يوم اغني وانا اغني على شانه
كني احس صوته من حواليّه=واذكره واتذكّر ضحكة اسنانه
يوم يقبل من ديارٍ نحاويه=رغم كل الشقا مايبدي احزانه
ثم يرمي بروحه داخل الفيّه=وقبل يرتاح يزهم كل ورعانه
في عيونه لنا نظرات حنيّه=تروي كبودنا لوكان عطشانه
ذكرياتٍ تكاد تلامس يديه=بعد مالامست قلبي ووجدانه
فرحةٍ عشتها لحظات وشويه=زهرة العمر واللحظات عجلانه
كن ذاك الزمان أحلام ليليّه=مابقا من كتابه غير عنوانه
فرقتنا ضروف الوقت جبريه=مات من مات واللي حي في شانه
فات عصر الصبا باحلام ورديه=والطموحات والآمال عجزانه
مثل منزالنا وبيوت مبنيه=مابقا من بناها غير سيسانه